Tun season ah beisei pha lo mahse Chelsea midfielder Enzo Fernandez chuan fans te chu player, staff leh manager te laka rinna nghat ngam turin a duh.Blues hian January transfer window ah player thar lakluh nan pound 300 million dawn inseng mahse eng ruai an ang hleithei lova, an game hnuhnung 10 atanga vawikhat chiah hnehna changin league table ah 10-na anni mek a, FA Cup leh EFL Carabao Cup atang te in an tla fel tawh bawk. Champions League lamah nise Round of 16 1st leg match ah German club Dortmund chu Signal Iduna Park ah sikhat faiin an ngam lo.
Daily Telegraph in an kawmna ah FIFA World Cup 2022 Best Young Player of the Tournament lawmman dawngtu Enzo Fernandez chuan manager leh team player te lakah fans te’n an rinna nghat ngam se a duh thu a sawichhuak.Fernandez chuan, “Player, backroom staff leh manager te hi fans te’n an ring ngam tur a ni. An hriat reng tura ka duh chu an aiawh a inlan kan ni a, game ah hnehna chan tumin theihtawp kan chhuah. Kan lakah rinna an nghat ngam anih chuan tuna kan dinhmun hi kan her danglam thei ngei ang” a ti.
Kum 22 mi chuan sawi chhunzawmin,” Fans te hi dawhthei deuh turin ka chah a, he club ah hian hmel thar kan tam em avangin engkim mai hi a bulthut atanga indinthar ang kan ni. Chuvangin hma lam kan panna kawngah hian an mi rinna kan mamawh hle.”League table a 10-na ni mek Chelsea hian naktuk Pathianni zan dar 7 ah league table a 5-na Tottenham Hotspur an luhkhung dawn a, inkhel hmuhnawm tak an chhawpchhuah ngei a rinawm hle.