Inter Miami zawm tur Lionel Messi bakah a chhungte chu Miami khawpuiah an tum ta rup mai le!
Messi hian Inter Miami tan kum 2 leh a chanve chhung daih tur contract a ziah a rinawm a, a contract hi thla 12 dang pawhsei theih tur a ni bawk.
Ballon d’Or 7 kawltu hian Miami ah season khat chhungin €45-55 million a hlawh dawn a, MLS sponsortu Adidas leh Apple company atanga chanpual (share) nei bawk in bonus thahnem tak a hailuhna tur te a ni.
Messi leh a chhungte hi nimin tlailam khan Miami airport ah hmuh anni a, Miami fans thenkhat te chu DRV PNK Stadium kawtah Messi lo thleng lawmin an pungkhawm nghe nghe.
Argentine World Cup winner hi tun Pathianni zan hian Miami player a ni tih tlangzarhna hun hman a ni dawn a, July ni 21 a Leagues Cup ah Miami leh Mexican club Cruz Azul te an inhmachhawn hunah a team thar tana a game hmasa ber a khelh a rinawm bawk.
Messi an MLS lam a pan tur hi United States football tan chuan rahbi thar kaina a ni hawt a, tun hma zawng aiin MLS lamin ngaihven leh ngaihhlut a hlawh zual sawt dawn.
Barca captain hlui hian World Cup winner ni chungin United States lam a pan a, nikum khan a ram Argentina chu FIFA World Cup a chawipui anih kha. 1986 hnua Argentina in World Cup an chawi leh hmasak ber tum a ni a, an history-a an vawi thum chawina a ni bawk.
Messi bakah Sergio Busquets pawhin Inter Miami a zawm dawn a, Barca defender hlui Jordi Alba leh Real Madrid legend Sergio Ramos te pawhin Miami ah Messi an zawm ve maithei.
”Ka rilru puthmang leh ka ngaituahna te hi a inthlak danglam dawn hauh lova, ka theihna zawnah chuan theihtawp ka chhuah zel ang. Keima tan leh ka club thar tan a tha ber ka pe ang. Level sang ber thlenga khel turin tan ka la chhunzawm dawn a ni” tiin Messi chuan Miami leh ama mimal tana theihtawp chhuah a tum thu ESPN kaltlangin a lo sawi tawh.
Miami hian chhantu an ngai hle a, an game hnuhnung 10 ah chakni hmel hmu tawh lovin MLS Eastern Conference ah table mawngphah an luah mek.