Ligue 1 match ah Monaco leh Paris Saint Germain te an inhmachhawn a, 3-1 in Ligue 1 champion lai hi an tlawm. Lionel Messi leh Kylian Mbappe te chuan hliam avangin Monaco an hmachhawn ve thei lova, Neymar hovin PSG an khel tha lua lo.
Monaco lam atangin Ben Yedder chuan goal 2 a khung a, Golovin an goal khat a thawh ve bawk. Mikhual lam PSG tan tleirawl kum 16 mi Zaire Emery chuan goal a khung a, team mualpho lutuk tur a hliahkhuh.
FIFA World Cup 2022 hnuah Paris Saint Germain in beisei an pha lova, kumin chhung ringawt in vawi 4 lai an tlawm ta. An game leh ah German champion Bayern Munich chu UEFA Champions League round of 16 first leg match ah an hmachhawn dawn a, Bayern tan chuan tun tluka PSG tumna hun tha hi a tam âwm lo ve.
An form an hloh chu thuhran nise, player tha pahnih Kylian Mbappe leh Lionel Messi te chuan hliam avangin Bayern Munich an hmachhawn thei lo maithei a, forward tha dang Neymar lah hliam atanga a lo kir hnuin a la che tha thei mai bîk lo bawk.
Bayern Munich lam erawh an game hnuhnung pathum ah hnehna an chang fai vek a, goal 10 lai khung bawk in PSG hmachhawn turin an inpeih at tawh ngei ang.
PSG leh Bayern Munich te hi February ni 15 zinglam dar 1:30 ah round of 16 first leg an khel dawn a, Parc des Princes ah an insu ang. 2nd leg hi March ni 9 zinglam dar 1:30 a khelh a ni dawn a, Allianz Arena ah a ni ve thung ang.
PSG in Monaco ngam lo mahse league table chung ber an la luah chhunzawm zel tho va, game 23 an khelh atangin point 54 an hlawhchhuak tawh. Pahnihna ah Monaco an awm a, game 23 tho an khelh atangin point 47 an khawl ve tawh bawk.