Messi contract pawhsei tum hi thil âtthlak tak a ni! – Ex PSG player

PSG player hlui Jerome Rothen chuan Lionel Messi contract pawhsei tum chu PSG tana thil finthlak tak a nih loh thu a sawichhuak.

Argentine captain Lionel Messi an Parc des Princes an tun season daih bak contract a nei tawh lova, PSG chuan an forward kum 35 a upa contract hi pawhsei ngei tumin tha pui an chhuah.

PSG in Messi la chelhbeh an duh viau laiin PSG tana kum 6 lo khel tawh Jerome Rothen chuan Lionel Messi chu Paris ah cham tawh lo se a duh.

“Messi contract pawhsei tum hi thil âtthlak tak zawng a ni. Messi, Neymar leh Mbappe te enkawl ho hi thil harsa tak a ni a, chu bakah an hlawh zawng zawng hi a tam lulai hle bawk. Financial Fair Play a PSG in buaina an tawh thin chhan pawh player te hlawh zat hailan anih vang a ni.”

“Hei tunah Messi hlawh tel lova insiamremna hun tha an nei a, player naupang zawk lâkluh kawngah leh squad tichhah kawnga hmasawnna hun tha a ni. Heng zawng zawng ngaituah hian Messi contract pawhsei tum hi thil âtthlak tak a ni” tiin PSG player hlui Jerome Rothen chuan a sawichhuak.

France tan pawha lo khel tawh Rothen chuan sawi chhunzawmin,” Hetiang ang hlawhtlinna leh ropuina zawng zawng a chan tawh hnua football a la khel chhunzawm duh zel hi ka hrethiam thei lo. Club hi hma lam pan pui tumin theihtawp a chhuah lova, fans te hnenah lawmthu a sawi loh mai bakah inkhelh banah kun hniam chungin locker room a pan nal nal zel.”

“A goal khung fans te’n an lawm pawhin stadium ah ring takin a hming an lam ri a, amaherawhchu Messi hian fans te hmaa mawi taka han chet a tum lem lo. PSG hmachhawp hlenchhuah kawngah hian tan a la nasa tawk lova, ani kawl chhunzawm zel thil thil finthlak a nilo” a ti.

Ballon d’Or vawi 7 dawng tawh Lionel Messi hian 2021 nipui transfer bazar lai khan free transfer in Paris Saint Germain a zawm a, Ligue 1 champion tan hian game 58 a inlan atangin goal 26 leh assist vawi 28 a thawkchhuak tawh.