Manchester United legend leh DC United manager hna thawk mek tu Wayne Rooney chuan Lionel Messi an Major League Soccer lam a pan tur chungchangah a ngaihdan a sawichhuak.
England legend hian Messi a fak hle a, Argentina captain in Inter Miami a zawm tur hi MLS tan chuan a phurawm tawh hle in a hria, United States league tan hamthatna nasa tak a rawn thlen ngei pawhin a ring.
Kum 36 a upa Messi an Paris Saint Germain-a a contract a hman zawh hnuin Inter Miami zawm turin thutlukna a siam fel a, Barcelona ah a kir leh theih tak si lo ah chuan European club dang zawm a tum loh bakah sum thahnem tak hlawh tura Al Hilal sawmna pawh a hnawl a ni.
Messi an MLS lam a pan tur chungchangah Rooney chuan a ngaihdan hetiang hian a sawi, “MLS tan chuan hmalakna ropui tak a ni. Sumdawnna ang zawng pawhin hmasawnna tam tak a rawn thlen dawn a, hmun hrang hrang atangin MLS hi an ngaihven zual sawt ang. Chu chu a thleng ngei dawn a, a chhan chu football khel tawh zinga player ropui ber tia sawi theih turin MLS a rawn pan dawn vang a ni.”
”He hmunah hian a rawn kal anga, inelna rilru pu rân chungin a team Miami chu table chung lamah hlankai a tum dawn. Fans mai nilo, coach leh players te thleng pawhin Messi an he league a rawn pan tur hi an phur tlang hle a ni” a ti.
Messi club thar tur Inter Miami hi Eastern Conference ah table mawngphah an luah mek a, puihtu ngaiin an rum mek. Lionel Messi bakah Sergio Busquets te ho in an zawm anih ngat chuan Inter Miami dinhmun hi a kang awk awk ngei in a rinawm.
Hetih mek lai hian Rooney chuan a lo khelh tawhna DC United ah nikum July thla atang khan manager hna a thawk tan a, Man Utd legend hian a team kaihhruai chu Eastern Conference ah pariatna a nihpui mek.