Inter Miami lama bul tan tha tak Lionel Messi an a club thara a teammate zawng zawngte headphone thar pair khat theuh a pêk thu Inter Miami defender Yedlin chuan a sawichhuak.
Argentine captain Messi an Miami a zawm fel hnuin a teammate thar te nena inkungkaihna tha zawk an neih theihnan headphone thar pair khat theuh a pe a, heng headphones te hi rawng dum leh sen dânga inchawih niin chu chu Inter Miami jersey rawng ang chiah a ni bawk.
DeAndre Yedlin chuan Messi thilpêk chungchang hetiang hian a sawi, “Amah Messi kha in zawt chiang thei ang. Team player zawng zawng te min pe a, a lei thar te anni em ka hre lo. Mahse a game hmasa ber atan player zawng zawng te head phone thar vek min pe a ni” a ti.
July ni 15 khan Messi an Inter Miami a zawm fel a, Leagues Cup match a Cruz Azul lakah a game hmasa ber a khel bawk. Kum 36 a upa hian Miami tana a game hmasa berah a team thar chu 2-1 in hnehna a chanpui a, hun tawp dawn 90+4 minute ah a free kick goal mawi zet hmangin chakna goal a khung anih kha.
A game hnihna ah pawh a team thar hi 4-0 in hnehna a chanpui leh a, Atlanta lakah goal hnih khungin assist tum khat a nei bawk. Goal hnih dangte hi Robert Taylor khung a ni.
Messi hian a career a hun tam zawk chu Barcelona tan a hmang a, Spanish club tan hian goal 672 zet mai khungin trophy lah a chawi tam narawh. Season hmasa pahnihte erawh Paris Saint Germain tan a khel thung a, Ligue 1 champion tan hian goal 32 a khung.
Tuna a club thar Inter Miami ah Lionel Messi hian season khat chhungin sponsorship telloin £38-9m – 46.7m vel a hlawh dawn a, MLS club ah hian 2025 December thla thleng daih tur contract a nei bawk.
