Andres Iniesta chuan a teammate hlui Lionel Messi an Barelona lama kir lova Inter Miami a zawm tur chu a dem lova, a tana duhthlanna dik anih ngei pawh a ring.
Ballon d’Or 7 neitu Messi an Paris Saint Germain-a a contract a hman zawh hnuin Barcelona lamah a kir leh ngei ringtu an tam hle a, ani ngei pawh in a club hlui kawr haa inkhelh leh chu a chak hle.
Messi transfer chungchangah Jorge Messi leh Barca hotute pawh in inbiakna an nei ngei a, amaherawhchu nguthluk zawka thil an ngaituah hnuin Messi an Barca lama kir ai chuan Major League Soccer lama a career chhunzawm turin thutlukna a siam fel ta zawk a ni.
Messi an Inter Miami a zawm tur chungchangah Iniesta chuan a ngaihdan DAZN kaltlangin hetiang hian a sawichhuak, ”Barca ah kir leh thei ni ngat se a tan pawh thil tha tak anih mai bakah a special in awmze ril tak pawh a nei ngei ang. Amaherawhchu a tawpah zawng tu mai pawh hian an tana thlan tur tha ber an thlang a, an tana tha ber tur nia an ngaih lam an hawi mai thin. Chuta tang chuan a hmaa an tawn ngai loh thil thar tam tak pawh an tawng bawk. MLS lam pan a châk a, a kal duhna hmun anih pawh in tha takin a va che/khel ang tih ka chiang a, a chhan chu a awmna hmun khawi ah pawh a chet that thin vang a ni.”
Iniesta chuan kum 20 mi Pedri chungchanga reporter zawhna pawh chhang leh in, “Kum la naupang tak ni mahse en bik a hlawh dêr tawh a, team a player pawimawh tak niin inkhel mualah thil tha tak tam a thlen bawk. Hma a sawn chho zel dawn tih ka chiang a, hmasawn zel na tur atana team tha berah a awm bawk. Season thar pawh ropui takin a hmang leh ngei dawn tih hi ka ring tlat a ni” a ti.
Barca hian season hmasa khan Laliga title an chawi a, season thum chhung an awl hnuah league title an chawi leh ta nge nge a ni. Season tharah pawh Blaugrana hian tha taka chet chhunzawm zel an tum dawn a, an midfield lai tichak zual turin Man City treble winning captain Ilkay Gundogan chu free transfer in an lalut fel tawh a, German international kum 32 a upa hian season hnih chhung daih tur Camp Nou ah contract a ziak a ni.