Inter Miami co owner David Beckham chuan an player lâkluh thar Lionel Messi an tun Zirtawpni ah Miami tana a game hmasa ber a khelh theih loh maithei thu a sawi a, a sawi anga a thleng tak tak anih chuan ticket lei nana sum tam tak insêng fans te tan chânna a ni dawn!
Miami hian Leagues Cup match ah Liga MX lam Cruz Azul an hmachhawn dawn a, mi tam tak chuan he match hi Miami tana Lionel Messi inlan hmasak ber tum anih an ring.
Amaheawhchu Inter Miami co owner leh England legend David David chuan he match ticket lei nana sum tam tak lo insêng tawh fans te tana ngaihthlak nuam loh tur thil a sawi a, chu chu Argentine captain a la inlan hman loh maithei thu a ni.
ESPN Argentina in an kawmna ah Beckham chuan an hma game a Mexican club an hmachhawn tur chu chona anih thu leh an star player Messi erawh a la inlan theihloh maithei thu a sawichhuak!
“Leo hian kan game leh hi a khel ang em tih kan hre lova, minute tlem tê te chu a inlan ve mahna. A pawimawh ber chu inpeih at a a awm a ngai a, chuvang chuan a inkhel thei nghal mai dawn em kan hre lo. Kan humhim a ngai a, inkhel tura a inpeih hunah chauh a inlan ang. Chawlh a hman hnuin a lo kir ve leh chauh va, ngai awh turin hun tlem a la mamawh a ni. Chutihrualin team rualin a train tawh a, hmuh pawh a nuam hle bawk” tiin Beckham chuan Messi an Cruz Azul a hmachhawn theih loh maithei thu a sawi.
Man Utd legend chuan sawi chhunzawmin, “Lio leh Tata te’n Messi inlan theih hun tur an tichiang dawn a, tun Zitawpni hian a inlan ang em tih pawh kan hre thuai ang. Engpawhnise kan hmaa game boruak tur hi a pui dawn a, hnehna kan chan ngei pawh ka beisei” a ti.
Messi lo thlen avangin Inter Miami fans te an phur thar em em a, an game leh a Cruz Azul an hmachhawn hunah Ft Lauredale a DRV PNK Stadium a fans te thutna 18,000 pawh a khat pup dawn e!
SeatGreek chuan he match tura ticket an hralhchhuah khan ticket pakhat manah $287 an lalut a, hei hi a man tlawm ber chi a ni nghe nghe. Lionel Messi game hmasa ber tur anih ring in ticket leitu thar an pung hluai a, reilote chhungin ticket awm zawng zawng hi lei zawh a ni. Ticket chan tawh loh avangin thenkhat chu sum tak tak sêngin an inleichhawn sak a, seat pakhat man chu $110,000 lawih a inleichhawn sak te pawh an awm!
Hei hian Miami fans te’n an tana Ballon d’Or 7 kawltu game hmasa ber an hmuh châk zia a tilang chiang a, Cruz Azul an hmachhawn hunah Messi hi a inlan lo anih ngat chuan Miami fans lungawi lo fe fe an kat nukin a rinawm.
