UEFA Champions League group stage match hnihna inkhel ah Israel club Maccabi Haifa chuan Paris Saint Germain an lo mikhual a, mual neitu lam atangin Tjaronn Chery chuan hmahruaina goal khung mahse team tha zawk mikhual lam atangin Messi , Mbappe leh Neymar te’n goal khat theuh in an chhanglet a, Paris lam hian 3-1 in hnehna an chang.
Argentine captain Lionel Messi an nizan khan Champions League ah record thar pahnih a siam a, a tan chuan zan chhinchhiahtlak te zinga mi a ni ang.
Maccabi Haifa laka goal khat khungtu Lionel Messi hian Champions League ah club hrang hrang 39 lakah goal khung tawh in hetiang ti thei player an la awm lo. Champions league history a goal khung tam ber Cristiano Ronaldo hian club hrang hrang 38 lakah goal a khung tawh.
Real Madrid striker Karim Benzema an club hrang hrang 34 lakah a khung tawh a, Real Madrid legend Raul khan club hrang hrang 33 lakah a lo khung ve tawh bawk. Tin, Bayern Munich striker hlui tuna Barcelona striker ni ta Robert Lewandowski hian club hrang hrang 31 lakah goal a khung tawh.
Messi an nizan a record thar a siam dang leh chu , ani (Messi) chauh hi Champions League chanchin a season 18 chhung a zawna goal khung thei player a ni.
Tun season kal mêk ah Paris Saint Germain an che tha a, Champions League game 2 an khelh atanga la chak ve ve in group H table chung ber an luah mêk. League lamah game 7 an khelh atangin point 19 an hlawhchhuak tawh a, table chung ber ah bawk an awm.