Lionel Messi chu kaihza hliam avangin UEFA Champions League round of 16 first leg a Paris Saint Germain in Bayern Munich an lo mikhual hunah a inlan thei lo maithei.
Kum 35 a upa hi Coupe de France Round of 16 a PSG in 1-2 a Marseille an hnehlo tumin a inhliam nia sawi a ni a, engtia rei nge a chawlh dawn hriat nilo mahse France chanchinbu L’Equipe chuan Messi chu UCL last 16 first leg a a inlan hman loh tur thu a tarlang.
Barcelona forward hlui hian ram leh club tan season duhawm tak a hmang mêk a, Argentina chu World Cup a chawi pui mai bakah league lamah pawh a team chu table chung ber a luahpui mêk.
Messi hian tun season ah PSG tan league goal 10 leh assist vawi 10 a thawkchhuak tawh a, Champions League lamah pawh game 5 a inlan atangin goal 4 leh assist vawi 4 a nei tawh bawk.
L’Equipe tarlan ang a Lionel Messi in Bayern Munich a hmachhawn thei dawn lo anih chuan PSG tan a pawi thui viau maithei. Messi mai bakah an forward rinrawl Kylian Mbappe pawhin hliam avangin last 16 first leg ah Bayern Munich a hmachhawn thei lo ang.
Messi leh Mbappe te’n hliam tawk mahse Neymar, Marco Verratti leh Sergio Ramos te chu an hliam a dam fel tawh a, an game hnuhnung ber khan Marseille lakah an inlan. Player pathum te hian Champions League ah German champion Bayern Munich an hmachhawn thei ang.
PSG leh Bayern Munich te hi February ni 14 zanlai ah Parc des Princes ah UCL last 16 first leg an khel dawn a, 2nd leg hi March ni 8 zanlaiah Allianz Arena ah an khel leh bawk ang. Team hrawl tak pahnihte insu tur hi a nghahhlel awm tawh takzet.