Kylian Mbappe an kuminah Parc des Princes a chhuahsan chuan Paris Saint Germain in a thlâktu turin Ousmane Dembele sign an tum dawn.
Dembele hi Mbappe thlâktu tura PSG player duh a ni a, a release clause pawh pêktlâk an inhuam hle. Kum 26 a upa France forward hian release clause €50 million bak a nei lova, heihi PSG in an pêktlâk chuan Barcelona in €25 million an chang ang a, Dembele leh a agent te’n a la bak zawng €25 million an chang ve bawk ang.
Kylian Mbappe chuan PSG hotute hnenah contract thar a ziah loh tur thu chiang takin a hrilh a, club lam pawhin an forward in a thlawna chan an duh loh avangin contract thar a ziah dawn loh chuan kumin nipui bazar hian hralhchhuah ngei an tum. PSG head coach thar Luis Enrique pawhin Mbappe hi han chelhbeh talh a tum lem lo nia sawi a ni.
PSG chuan Mbappe manah hian €200 million an chhiar a, Real Madrid lam erawh in Mbappe hi kuminah sign an tum lo nia report a ni thung. Nakkumah a thlawna lâkluh chu an duh dan a ni a, Mbappe pawh hian bonus tha tak a dawn theih dawn avangin France khawpuiah kum 2024 thleng cham a, nakkumah free agent a Santiago Bernabeu lam pan chu a duhdan a ni.
Engpawhnise PSG in contract thar ziah tum lo France captain hi hralhchhuah ngei an tum a, Mbappe an PSG a chhuahsan chuan Ligue 1 champion hian a thlâktu turin France forward tho Ousmane Dembele an sign an tum ang.
Dortmund star hlui hian season hmasa khan Barca tan game 35 a inlan atangin goal 8 leh assist vawi 9 a thawkchhuak a, a team chu Laliga title bakah Super Cup te a chawi pui a ni.