Real Madrid chuan kumin nipui bazarah Kylian Mbappe lakluh nan an player kawllai pahnih an hralhchhuah a ngai maithei. Los Blancos hian Mbappe chu nakkumah a thlawna lakluh an tum a, mahse tuna Mbappe dinhmun avangin an ruahmanna an thlak a ngai maithei.
France star Mbappe an club hotute hnenah contract thar a ziah loh tur thu chiang taka a hrilh avangin PSG lam pawhin an forward hi kumin nipui bazarah hralhchhuah ngei an duh a, club president Nasser Al Khelaifi chuan Mbappe chu inngaihtuah chian nan karhnih bak a neih loh thu a lo sawi tawh nghe nghe.
Kum 24 a upa Mbappe hian tunkar ral hmaa club hotute hnenah contract thar a ziah tur thu a hrilh lo anih chuan PSG lamin hralhchhuah ngei an tum dawn a, a manah €200 million an chhiar nia report a ni.
Daily Express tarlan danin Los Blancos chuan Mbappe lakluh nan player hralhna atanga sum hailuh an duh a, an midfielder kawllai pahnih Federico Valverde leh Aurelien Tchouameni te chu tun nipui bazara Santiago Bernabeu chhuahsan thut thei te anni. Player pahnihte manah hian Real Madrid chuan €100 million ve ve an beisei dawn nia sawi a ni bawk.
Real Madrid in tun nipui bazarah midfielder pahnih an lalut tawh a, €112 million man Jude Bellingham leh €20 million man Arda Guller te anni. Hetiang anih chuan Mbappe lakluh nan an midfielder kawllai te chu hralhchhuah awm ber anni reng a ni. Valverde leh Tchouameni te hi Premier League club lian te nena sawizawm anni.