Arsenal player leh scout hlui ni bawk Gilles Grimandi chuan 2013 khan Arsenal in French forward Kylian Mbappe lakluh an lo tum tawh thu sawichhuak.
Mbappe hi kum 14 chauha upa a nih khan Clairefontaine youth team tan a khel a, Monaco lam a pan hma in Arsenal nena sawizawm an lo ni tawh.
Arsenal tana Premier League nomawi pahnih lo chawi tawh leh North London club tana scout hna 2019 thleng thawk tu Grimandi chuan hetiang hian Mbappe lakluh an lo tum tawh thu a sawichhuak, “Scout hna ber chu player tha zawn hmuh anih rualin a tha tam tak kan hmaih ve bawk. Ka tan chuan Mbappe kha a la uiawm ber awm e. Khatih hunlai khan a rilru kan hmin thei ngang lo a ni. June 2013 thleng bak contract a nei tawh lova, February thlaah inbiakna pawh kan neihpui tawh nghe nghe. A rilru hmin thei ni ngat ila a club khelhna a thlak ngei ang. A tawpah erawh Monaco lama kal kha a thlang ta a ni” a ti.
Grimandi chuan sawi chhunzawmin,”Arsenal khan football tha ber an khel lova, chuvangin thil tih engkim mai kha a harsat phah. Result tha kan neih loh chuan player tha leh beiseiawm te sengluh an har em em a, chuvangin engtik lai mai pawha team tha nih a pawimawh. Thil eng pawh ti dawn ila a awlsam phah sawt thin.”
Mbappe an Monaco a pan hnuin a that zia khawvel mipui hriat ah a pholang a, 2017 khan PSG chuan man to takin an lalut. PSG a zawm hnuin a lar leh zual a, league title a chawi bakah 2018 khan kum 19 mi lek niin a ram France chu World Cup a chawipui. World Cup neih zawk takah khan France chu final a luhpui leh a, amaherawchu vanduaithlak takin Messi telna Argentina an ngam lo. Champion lo mahse Mbappe tana World Cup chhinchhiahtlak tak a la ni fan a, goal khung tam ber lawmman ‘Golden Boot’ a dawng.
Hetih mek lai hian 2013 a Mbappe lakluh lo tum tawh tu Gunners pawhin season duhawm tak an hmang chho mek a, league ah table a pahnihna City aia match khata khel tlem chungin point 5 in an fal tawh.