Kylian Mbappe pan tur club ala chiang thei rih lova, Paris Saint-Germain lamin contract pawhsei offer an pek chu a hnawl niin report in a tarlang. Selfish takin goal 50 lai mai khung mah ila, a team in UEFA Champions League nomawi a chawi chuan si loh chuan a tha lo niin a sawi.
Kylian Mbappe lak tum zingah Real Madrid an langsar ber a, January ni 1 atang pre contract a sawi pui theih dawn a, Real Madrid hian an sawi pui hmasak ber a rinawm.
“Nikum kha ka tan chan kum tha tak a ni, goal 40 lai ka khung, mahse, League leh Champions League nomawi kan chawi chuang lo” tiin Mbape chuan PSG television station-ah a sawi.
“A tawpah mak ka ti hle, goal 50 khung mahila hnehna kan chan chuan si loh chuan awmzia a awm lo. Goal tlem zawk khung a, league leh Champions League nomawi chawi hi ka thlang zawk.”
“Season tha tak hmang ve si, eng titles mah chawi loh chu hlim lohna mai a ni, titles hi football ah chuan a pawimawh ber a ni.”
Monaco forward hlui hi PSG player ah chu an chhuanvawr ber a ni a, heng atanga pressure lo awm pawh atan chuan chona lian tak a nih thu a sawi.
“Pressure sang tak awm hi ka mamawh, chona thar awm theihna turin, Ka ko ah hian tihtur hi englai pawhin awmse tih hi ka duh.”
“Thil duhawm lo tak a thlen lai pawh hian pressure hnuaiah awm ila ka ti, thil thar thiam belh nan a tha a ni.” tiin Kylian Mbappe chuan a sawi.
Tun season khelh mekah Kylian Mbappe hian Ligue 1 goal 9 khung tawhin assist vawi 8 a nei mek.
Source SL