Kylian Mbappe chuan transfer chungchangah Al Hilal lam chu inbiakna a neih pui duh lova, France captain hian tun dinhmunah Saudi lama insuan chu a tum lo hle niin a lang.
Mbappe leh club inkarah buaina lian tak a awm mêk a, kum 24 a upa hian season thar pawh PSG-a hman tluan a nakkumah a thlawna Real Madrid zawm a rilrûk a, hetih mêk lai hian PSG chuan man to taka an lâkluh hi a thlawna chân an tum lo hle thung. Contract thar a ziah loh chuan tun nipui bazar inkhar hma ngei a hralh an duh.
Ligue 1 champion hian 2017 khan Mbappe chu AS Monaco atangin €180 million sêngin an lalut a, football history a player man to ber pahnihna a ni. PSG lam chuan Mbappe an lâkluhna man kha hmuh kir leh an duh avangin to taka hralhchhuah ve an tum mêk.
PSG in Mbappe an hralh phal tih an hriat rualin European club lian tam tak bakah a ser zinga a mei ang Saudi lam an rawn lang ve leh zat a, nipui bazar tirlama Lionel Messi lâkluh tumtu Al Hilal phei chuan Mbappe manah PSG chu €300 million an offer!
Mbappe manah PSG lam nen a thuphunga an inrem hnuin Al Hilal chuan a player ber hmin tumin hma lâk tan an tum a, amaherawhchu transfer chungchangah Mbappe hian Al Hilal hotute chu inbiakna a neihpui duh chhin eih lo!
Sum ngaina tak tia mi tam tak sel rawn Mbappe hian tun dinhmunah league nêm zawk la pan mai a tum lova, UEFA Champions League chawi a duh avangin Real Madrid lama insuan chu a thil nghahhlel ber a ni mêk.
Mbappe hian Real Madrid tih loh European club lian dangte sawmna a pawm in a rinawm lova, Mbappe transfer chungchangah Real Madrid lam pawh an rawn lang thuai tura ngaih a ni.