May thla daih tawh khan Kane an Bayern sawmna a lo pawm tawh!

Tottenham Hotspur striker Harry Kane chuan May thla daih tawh khan Bundesliga champion Bayer Munich zawm turin thutlukna a lo siam fel tawh tih report chuan a tarlang.

German chanchinbu BILD tarlan danin Bavarians head coach Thomas Tuchel chuan May thla laihawl vel khan Kane chu London ah inbiakna neiin a lo titi pui tawh a, club project leh plan te hrilhfiah in English striker pawh hi a phur hle a, Chelsea manager hlui Tuchel sawmna chu a pawm.

Tuchel hian Kane chu league title bakah UEFA Champions League a chawipui theih tur thu a hrilh a, hei hian Kane a tiphur hle. A career a major trophy la chawi lo Kane hian club level ah UEFA Champions League trophy chawi a chak ber a, chu a duhna tihlawhtling tura zawm âwm ber pawl chu Bayern Munich hi anni reng a ni.

Nipui bazar a lo inherchhuak a, Bayern in Kane an dawr ngei anih hi. Amahearwhchu Kane chungchanga Daniel Levy dawr harsat zia tlangkam atang pawhin kan lo hre tawh âwm e.

Bavarians hian kum 30 ral kai tawh mai tur leh club a season khat bak contract nei tawh lo manah £60 million bid an theh lut a, amaherawhchu hnawl a ni.

Spurs chairman Levy chuan an club tana goal khung tam ber manah hian £100 million tal a beisei nia sawi a ni a, Bayern lamin Spurs phut zat an theh chhuak dawn em hre lo mah ila bid thar theh lut leh turin an inbuatsaih mek tih erawh report a ni.

English captain hi Bayern mai nilo European club lian dang Real Madrid leh Manchester United te pawhin an ngaihven hman a, amaherawhchu Kane mana £100 million insen chu tuna Man Utd budget nen a inmilh hlawl lo! Tin, Real pawh in Joselu an lakluh hnuin striker dang an beisei tawh lem lova, chutihrual chuan nakkumah a thlawn in PSG forward Kylian Mbappe sign an tum dawn.

Kane an Spurs ah thla 12 bak contract a nei tawh lova, kuminah club lamin an hralhchhuak lo anih chuan nakkumah a thlawna an chhuahtir a ngai dawn. Nakkum January transfer window a inhawn leh meuh chuan English striker hian club dang zawm turin pre contract a sign thei bawk ang.