Liverpool manager Jurgen Klopp chuan an defender Virgil van Dijk chu match start tura a inpeih tawh thu a sawichhuak. Merseyside derby ah Liverpool in 2-0 a Everton an hneh tumin Van Dijk hi team squad a telh a ni a, amaherawhchu a inkhel lo thung.
Reds in January ni 2 a 3-1 a Brentford an hneh tumin Van Dijk hi minute 45 chauh a inlan a, kaihza hliam avangin second half a khel chhunzawm lo.
Van Dijk inhliam hnuin Liverpool a che tha hleithei lova, league ah Brighton leh Wolverhampton te an ngam lo. Tin, FA Cup atangin Brighton chuan Klopp leh a hote hi an petchhuak bawk a, Kaoru Mitoma an hun tawp dawnah chakna goal a khung anih kha.
Tunah erawh Liverpool defender rinrawl Virgil van Dijk a dam fel tawh a, match start tura a inpeih thu manager Jurgen Klopp chuan press conference a hmachhawn hnuhnun ber khan a sawichhuak.
”Game start turin a inpeih tawh chuan ka hria. Nimin lam khan a inpeih tawh takzet tih ka hria a, vawiin ah pawh a dinhmun a that ka beisei a chuvangin a lakah thutlukna kan siam thuai ang” tiin German coach chuan a sawichhuak.
Reds defender zingah Ibrahim Konate chu a inhliam bawk avangin tun hnaiah Liverpool in central defender ah Joel Matip leh Joe Gomez te an chhawr nasa a, beisei erawh an pha lo dun hle. League table 9-na a awm mek Liverpool tana Dutchman Van Dijk lo kir leh hi thu lawmawm tak a tling a, Reds defense a tih phuisui ngei pawh a rinawm. Liverpool hian naktuk zan dar 11;00 ah league table a 4-na ni mek Newcastle United chu St James Park ah an hmachhawn ang.
