Manchester United zawm tawh mai tur Chelsea academy graduate Mason Mount chuan social media lamah buaina a tawk a, a Twitter account chu tihtawp (suspend) niin he thil titu hi Chelsea fans te an nih ngei pawh rinhlelh rual loh a ni.
Mount leh Chelsea hotute’n contract thar chungchangah inremna an nei thei lova, English international hian ama duhtu Chelsea hmelma leh elpui ni bawk Manchester United chu mimal inremna neihpuiin kum 24 a upa midfielder man tura hun engemaw chen Man Utd leh Chelsea te an indawr hnuin £55 million + £5 million in an inrem fel thei hlauh.
Mount hian Man Utd ah medical test a nei fel tawh a, contract pawh a sign tawh ngei in a rinawm bawk. Chelsea fans te thlahna thu social media lama a tarlan hma in Blues fans thahnem tak, Mount transfer chungchanga thinrim em em mai te chuan an hmangaih leh ngainat em em thin Mount Twitter account hi an report a ni âwm a, English star Twitter account hi suspended mêk a ni!
Twitter account suspend vel chu lo dahtha phawt ila, Red Devils in Mount an lâkluh thu an puang tep a, tun nipui bazara Red Devils player sign hmasak ber tur a ni nghe nghe.
2021 leh 2022 Chelsea player of the year award dawngtu hian July ni 12 ah Norway a Man Utd in pre season friendly match a Leeds United an hmachhawn hunah a club thar tana a game hmasa ber a khelh ngei a rinawm.