Manchester United defender hlui Nemanja Vidic chuan Lisandro Martinez a fak hle a, Red Devils tana a khelhdan chuan a tihlawm thu a sawi.
Kum 41 a upa Vidic hi Man Utd player ropui ber pakhat a ni a, Red Devils tan hian Premier League title 5, League Cup 3, Club World Cup 1 leh champions League 1 te a chawi.
Man Utd legend hian Argentine defender Lisandro Martinez a fak hle a, team tana a pawimawhna hetiang hian a sawi, ” Lisandro hian thlaruk liamta mai khan he hmun hi rawn pan ve chauh mahse a khel tha thin hle a, England a inkhelh hi nuam a ti hle ni hian a hriat. Tin, Man Utd tana signing tha tak a ni bawk.”
“Raphael Varane nen hian tun ai maha an thawhdun that zawk ka la ring fan a, Premier League a Lisandro a insiamrem vat chhan pawh hi Varane vang a ni pakhat awm e. Lisandro khelhdan avang hian ka lawm em em a, team a chawhphur dan te, a chet rothap dan te leh chak duhna tak tak rilru pu a a inkhel te hi a hmuhnawm hle thin” a ti.
Ft 5 leh inches 9 a sang Martinez hian nikum nipui transfer bazar lai khan pound 56.7 million in Ajax atangin Manchester United a zawm a, a game hmasa lamah beisei pha lo mahse a insiamrem thuai a, tunah chuan Red Devils player pawimawh ber pakhat niin bench a Harry Magure leh Victor Lindelof te hun hman tir fo tu a ni.
Kum 25 a upa hian tun season ah Red Devils tan league game 20 a khel tawh a, 2022 FIFA World Cup Argentina a champion pui tum khan match 5 a khel bawk a ni.
