Manchester United centre back Lisandro Martinez chuan Telegraph in an kawmna ah a defender hmachhawn tawha tawhkhirh a tih ber chu Arsenal forward Gabriel Jesus a nih thu a sawichhuak.
Argentine defender hian tun season Premier League ah tum khat chiah Jesus hi a la hmachhawn a, Old Trafford ah niin mual neitu Man Utd chu 3-1 in an chak.
Kha game ah khan Antony chuan Man Utd hmahruaina goal a khung a, Arsenal lamin Saka goal hmangin an rawn chhanglet. Amaherawhchu Man Utd lam tan Rashford an goal hnih dang rawn khung leh in a team chu hnehna a chanpui.
Gabriel Jesus an Arsenal lakah goal khung lo mahse player hmuhnawm ber te zinga mi a ni a, Man Utd defender te tan a hnawksak hle. Saka goal luh kawngah pawh a inrawlhthuk hle bawk.
Kum 25 a upa hian nipui transfer bazar liamta khan £45 million in Manchester City atangin Arsenal a zawm a, Gunners tan league game 14 a inlan atangin goal 5 leh assist vawi 5 a thawkchhuak tawh. World Cup khelh lai khan khup hliam a neih avangin tun thlengin erawh a la inlan leh lo thung.
City lam aiin Arsenal ah Jesus a hmuhnawm zawk a, Mikel Arteta an a hmang thiam hle. Tin, winger leh striker anga a khel kawp thei hian a tangkaina a tizual hle bawk niin a lang.
Hetih mêk lai hian Jesus hmachhawn harsa ti em em tu Lisandro Martinez pawhin Erik Ten Hag hnuaiah season tha tak a hmang mêk a, Premier League centre back tha ber pawl hian a ram Argentina chu FIFA World Cup 2022 chawipui bawk in mite’n ‘Premier League a khel tur chuan a tê mah mah’ tia an ngaihdan chu ft 5 leh inches 9 chauh a sang Martinez hian a thlak chiang hle.