Sadio Mane chungchangah Al Nassr leh Bayern Munich te an inrem fel a, Liverpool star hlui hian €35 million in Cristiano Ronaldo khelhna Al Nassr a zawm ang.
Kum 31 a upa forward hian nikum nipui bazar lai khan €40 million in Liverpool atangin Bayern Munich a zawm a, beiseina sang tak nen Allianz Arena lamah insuan mahse beisei a phâk tehchiam lova, a teammate Leroy Sane lakah kut hial a thawh avangin club lam chuan pawisa an chawi tir bakah match khat inkhel thei lo turin an hrem zui a, hei vang hian club ah a tlâktlum loh zual phah hle bawk.
A teammate nena an inkar boruak a chhiat bakah inkhel muala beisei a phâk tehchiam loh avangin Bayern Munich chuan Mane hi hralhchhuah mai an rilrûk tawh sa hrim hrim a, an beisei ang in thil a thleng thei dawn e.
Mane chungchangah club pahnihte an inrem tawh a, mimal thilah harsatna a awm loh bawk avangin Senegalese international hian European star dang te ang in sum tam hlawh turin Middle East lam a pan thuai ang.
Sadio Mane hian season hmasa khan Bayern Munich tan inelna hrang hranga game 37 a inlan atangin goal 11 leh assist vawi 6 a thawkchhuak a, a team chu Bundesliga title a chawi pui.
Hetih mêk lai hian season hmasa Saudi Pro League a pahnihna Al Nassr in an squad an thawmtha chho mawlh mawlh a, tun nipui bazarah Europe a player tha thenkhat Marcelo Brozovic, Seko Fofana leh Alex Telles te’n Ronaldo team an zawm tawh. Sadio Mane chu Ronaldo teammate thar a ni thuai dawn a, Man Utd centre back Eric Bailly pawh Al Nassr zawm tura ngaih a la ni cheu.
Kuminah European player thahnem takin Saudi lam an pan sup sup avangin Saudi Pro League hian season tharah en a hlawh dawn hle a, a bikin Ronaldo khelna Al Nassr chu champion tura rinkai ber te zinga mi anni bawk.
