Liverpool star hlui tuna Bayern Munich tana khel mek Sadio Mane chuan a khelhpui tawha finisher tha ber ah Mohamed Salah hming a lam ri lo.
Senegalese international hian Anfield-a kum 6 chhung hun a hman hnuin nikum nipui transfer bazar khan German champion Bayern Munich a zawm a, a team thar tan game 22 a inlan atangin goal 10 leh assist vawi 4 a thawkchhuak tawh. Kum 30 a upa hian Merseyside club tan Premier League leh UEFA Champions League te a chawi a, a forward pui thin Salah leh Firmino te nen an hunlaia attacking trio hlauhawm ber pakhat an din.
Liverpool tan Mane leh Salah te goal thahnem tak khungin inkawp fuh viau mahse Bayern forward hian a khelhpui tawha finisher tha ber chu Mohamed Salah nilo in Divock Origi anih thu a sawichhuak.
Liverpool boss Jurgen Klopp pawhin Origi chungchang hetiang hian a lo sawi tawh,” Inkhel mualah leh pawn lam thlengin legend a ni. Footballer tha tak a ni a, world class striker niin kan team a finisher tha ber a ni bawk” a ti.
Belgium international Origi hian nikum khan Liverpool chhuahsanin AC Milan a zawm a, a club thar tan erawh beisei a pha lo hle. Kum 27 a upa hian Serie-A champion tan game 21 a inlan atangin goal 2 chauh a la khung a, Italian chanchinbu thenkhat chuan season khat chhunga signing fuh lo ber (worst signing) anih thu an tarlang nghe nghe.
An kawmna ah Mane chuan Jordan Henderson chu hruaitu tha tak anih thu a sawi a, Bayern lama a teammate Alphonso Davies tlanchakna (pace) leh Jamal Musiala ball chawh (dribbling) theihna te a awh thu a sawichhuak. Tin, Mane hian club-a a teammate hlui Virgil van Djik aiin ram (Senegal) tana a teammate Kalidou Koulibaly chu defender tha zawk niin a ngai bawk.
