Nisarih liamtaah khan Manchester club pahnih United leh City chu European competion atangin an tlawm ve ve a nih kha. Man City hian UEFA Champions League final an khel a, Man Utd in Europa League final an khel ve bawk.
Man Utd leh City chungchangah talkSPORT pundit Trevor Sinclair chuan a club hlui Man City chu engkimah a chungnung zawk tawh niin a sawi, pitch chhunga pawh ni se, pitch pawnah an chungnung zawk niin a sawi.
“Manchester City hian engkimah hma an hruai tawh ka ring.” tiin talkSPORT pundit Trevor Sinclair chuan a sawi.
Kum 5 chhungin Manchester City hian Premiere League nomawi pathum lai an chawi a, Sir Alex Ferguson’an 2013 kuma Manchester United a chhuahsan hnuin, Premiere League nomawi an chawi leh tawh lo.
Ferguson’an United a chhuahsan hnuah trophies 4 chiah an la chawi a, kum 2017 a Jose Mourinho enkawl lai pawh khan nomawi pakhat a chawi pui.
Hetihlai hian Jamie O’Hara erawh chuan Sinclair sawi anglo deuhin Manchester United hi Real Madrid te huangah khawel club lian ber an nih rih thu a sawi.
“Manchester United hi khawvel club lian ber an ni, Real Madrid te huanga awm anni.”
“Manchester City pawh hi khawvel club lian zingah an tel teuh hle. An hlawhtling a, club hlawhtling tak pakhat an ni. Mahse, European nomawi an la chawi lo tlat. Khawihmunah pawh Manchester United hi an hnaih theilo hrim hrim.” tiin Jamie O’Hara chuan United an lian zawk niin a sawi ve thung.
Man City hi club lian zawk a ni titu, Sinclair chuan ti hian a sawi, “Football club fundamentals leh foundation a pawimawh, player, stadium, training ground, trophy chawi, tih vel han thlir let chuan Manchester United-ah hian tun dinhmunah ala awmlo a ni.”
“Kei chuan Manchester City hi club lian ka la ti fan ang” tiin a sawi tel bawk.
Source Sportbible.