Manchester City legend David Silva chuan inkhelh a chawlhsan thu a puang ve le ta.
Spanish midfielder hian 2010 khan Valencia atangin Manchester City a zawm a, English champion tan hian kum 10 a inlan chhungin game 436 lai khel in Premier League title 4, EFL Carabao Cup 5, FA Cup 2 leh Community Shield 3 te a chawi.
Kum 37 a upa hian 2020 khan Manchester City chhuahsanin Real Sociedad a zawm a, Spanish club tan hian a season 4-na a hman dawn mêk laiin training-na ah khup hliam a nei hlauh a, a hliam hi a nat êm avangin a tum ai hma in inkhelh a chawlhsan a ngaih phah!
A career a kum 20 chhungin Silva hian Eibar leh Celta Vigo tan te pawh a lo inlan tawh a, a ram Spain tan game 125 lai a khel bawk. Spain in 2008 Euro, 2010 World Cup leh 2012 Euro an champion tum te khan Man City legend hi Spain squad ah a tel ve nghe nghe.
Inkhelh a chawlhsan chungchangah David Silva chuan hetiang hian thu a thlah, “Ka tan chuan vawiin ni hi ni lungchhiat thlâk tak a ni. Vawiin hi ka nun puma ka inpumpêkna zawng zawng ka mangtha hun chu a ni. Ka teammate, chhungte ang maia ka en te ka mangtha hun a inherchhuak a, ka ngai dawn hle a ni.”
“Ches (Valencia), Armeros (Eibar), Celtinas (Celta Vigo), Cityzens (Man City) leh Txuri Urdines (Real Sociedad) te chungah lawmthu ka sawi a, ka in ang maia ka ngaih te anni” a ti.
