Manchester City chuan Tottenham striker Harry Kane lak luh theihna turin pawisa mai bakah player pek an duh niin report in an tarlang.
Manchester City manager Pep Guardiola chuan Jack Grealish an lak luh tawh hnuah, Harry Kane pawh lak luh an duh niin a sawi a nih kha.
England-a report thenkhattin an tarlan dan chuan Spurs chairman Daniel Levy hian an striker man atan hian Pound maktaduai 150 vel a chhiar niin an tarlang a, hetiang zata an lak luh theih chuan Bristish football history-a player man to ber a ni thei dawn a ni.
Manchester City hian British transfer history-ah player man to ber Jack Grealish an kawl mek a, a man hi Pound maktaduai 100 vel a ni.
Daily Mail in an tarlan dan chuan Harry Kane man atan hian Bernando Silva an offer tel a, Bernando Silva an la lut tel thei a nih chuan Harry Kane man hi a tlawm thei deuh dawn niin an tarlang.
Communite Shield khelh hma khan Guardiola chuan Manchester City player chhuak duh 3 hming a sawi a, chhuak duh zingah hian Bernardo Silva pawh hi a tel a ni. Mahse, Silva chungchangah offer an hmuh loh thu a sawi chhuak bawk.
Jack Grealish’an City a zawm hnuah Silva tan khelhna chance a tlem deuh maithei a, season hmasa atang tawh khan club chhuahsan a duh tawh niin sawi a awm.