Barcelona boss Xavi chuan a striker kawllai Robert Lewandowski chu a fak hle a, khawvela player tha dang a tu nen maha inthleng a phal lo.
Polish striker hian Bayern Munich chhuahsan a duh tih mipuite hriata a sawichhuah hnuin transfer bazar liam ta khan Camp Nou a pan. Kum 34 a upa ni tawh mahse Barca lam chuan a manah £45 million vel an la inseng tho mai. Barcelona ah Lewandowski a insiamrem thuai a, game nga a inlan atangin goal 8 a khung der tawh.
Reporter te’n ‘Lewandowski leh tun hnaia thawm nei lian em em Erling Haaland te hi engtin nge i khaikhin’ tia an zawhna Xavi chuan chhangin,” Robert hi he khawvela player a tu nen maha inthleng ka phal lo. Tawnhriat neih tam hi a pawimawh em em a, chu chuan mi puitling takah a siam. A khelhdan hmang hian player naupang zawk te a tanpui. Engkim chawi tawh mahse inphahhniam takin he hmun hi a rawn pan a, tuna a thil tih mek hi mi naran chunglam tih chi a ni” a ti.
Tun season ah Barcelona in hnehloh an la tawng lova, league table ah 2-na ni mek in point 10 an hlawhchhuak tawh. Champions League lamah pawh table chung ber an luah mek a, tunkar khan group stage game hmasa berah Viktoria Plzen chu 5-1 a sawp in Lewy an hattrick a siam nghe nghe bawk.
