David De Gea chuan Manchester United tana league game 400 a khelh tlin zanah a team hnehna a chanpui a, chu mai a la nilo, clean sheet a nei nghe nghe bawk.
Spanish goalkeeper hi British player nilo, club pakhat tana Premier League game 400 khel tling thei hmasa ber a ni a, record ropui a ni!
Kar hmasa lama Old Trafford a 2-2 a an inhnehtawk hnuin nizan khan Elland Road ah Leeds leh Man Utd te an insu leh a, Marcus Rashford leh Alejandro Garnacho te goal hmangin mikhual lam hian hnehna an chang a, point 3 pawimawh tak an hlawhchhuak.
De Gea pawh in Red Devils tana Premier League game 400 na a khelh zanah a che tha hle a, Crysencio Summerville shot tha tak tak tum hnih lai a dang.
Ryan Giggs (632) leh Paul Scholes (499) te chauh hi Manchester United tana De Gea aia league game khel tam zawk anni a, English club ropui tan De Gea hi a daih rei viau a ni.
Inkhelh banah kum 32 mi chuan hetiang hian league game 400 a khelh tlin chungchangah a ngaihdan a sawichhuak,”Game 400 lam ai chuan hnehna chan kha a pawimawh ber zawk. Hnehna kan chang thei a, chuvangin league game 400 khelh tlin lawmna chu ka nei thei tawh ang. He hmuna lo kal a zanin ang a khelh theih kha a pawimawh em em a, clean sheet leh point 3 hrawl tak nen, zan sawisel bo a ni.”
