Manchester United tan Mason Greenwood a inlan leh thei dawn niin a lang a, a chhan pawh club main Sponsor Adidas chuan Greenwood hi Man Utd kawr haa a inkhelh leh an phalsak vang a ni.
Kum 21 a upa hi Man Utd ah a hma hun a chiang lo ruai a, a chunga club hotute thutlûkna a nghak mêk. January 2022 khan pawngsual thubuai avangin Man Utd chuan inkhel thei lo turin an hrem a, English international hian thla 17 chhung zet chu Carrington ah team squad rualin training a zawm tawh lo.
Amaherawhchu thla hmasa lam khan Greenwood tan hun duhawm a inherchhuak a, Crown Prosecution Service chuan a laka thubuai awm zawng zawng te chu thlauthla in rorelna in ah thiam a chantir.
Court lamin thiam chantir tawh mahse club lamin Greenwood chungchangah thutlûkna tun thlengin an la siam lova, a hma hun chiang lo ruai karah kum 21 a upa loan a chhuak tur ang te a sawi thawm a tam hman viau bawk.
Tunah erawh The Sun chuan Man Utd main sponspor Adidas lamin Greeenwood hi club tana a inlan leh phalsak a, hemi chungchangah Man Utd hotute pawh an biak tawh thu a tarlang. Tin, Man Utd player dang te pawhin Greenwood hi club tan inlan leh thei ngei se tih chu an rilrûk hlawm nia report a ni bawk.
Man Utd in an hmatawng tichak zual turin Rasmus Hojlund lâkluh an tum a, Hojlund bakah Greenwood hi season thar atanga an chhawr thei anih chuan Erik Ten Hag an hmatawng lamah duhthlan tur a nei tam sawt ang.
Adidas leh Man Utd te hi 2015-16 season atang khan an thawkdun tan a, kum 10 chhung daih tur contract neiin an contract hlut zawng hi £750 lawih a ni. Adidas an thawhpui hma hian Man Utd chuan Adidas elpui Nike chu kum 13 chhung ngawt mai an lo thawhpui tawh bawk.