Vitor Roque agent Andre Cury chuan a client Barcelona lam pan ta Roque chu English team pahnih Manchester United leh Tottenham Hotspur te’n hijack an lo tum thu a sawi.
Cury hian Charla Podcast kaltlangin United leh Spurs te’n Roque transfer hijack tuma theihtawp an chhuah thu a sawi a, a tawp lama an bid theh luh phei chu €100 million dawn a ni nghe nghe!
Mahse Roque hian club dang sawmna hnawl in Spanish champion Barcelona a zawm a, Camp Nou ah kum 8 chhung daih tur contract ziak in nakkum atangin Barca a zawm tan ang. Catalans lam pawhin Roque manah €30 million an pe phawt anga, a khelhthat dan bakah goal leh trophy te a chawi dan a zirin add ons €26 million dang an pe tla leh ang. Tin, Ballon d’Or dawng thei tur top 3 ah a hming a lan chuan Barca hian €5 million chu Athletico Paranaense hnenah an pe leh dawn bawk.
”Vitor Roque man tur Tottenham leh Manchester United te atangin offer tam zawk fe kan dawng a, a tawp lama an offer rawn chhawpchhuah kha €100 million dawn a ni! Mahse a career a kan ruahmanna hi ruat lawk diam a ni tawh a, chuvanga Barcelona lam thlang kan ni. Tun dinhmunah hian sum kan en ber lova, a career tana tha tur kan thlir zawk” tiin agent Cury chuan Vitor Roque an English team zawm lova Barca lam an thlan chhan a sawifiah.
Athletico Paranaense hian Roque manah Barca lam atangin English team te offer chanve aia tlem an dawng a, hei hian Roque an Camp Nou lam pan a duh zia a tichiang viau awm e.
Kum 18 a upa hian nakkum nipui bazarah Barcelona hi a zawm tan dawn a, tun dinhmunah erawh a team Athletico Paranaense chu Copa Libertadores chawipui ngei tumin tan a la mek.