Ajax CEO Edwin van der Sar chuan engtikniah emaw Manchester United lamah a kir leh tur thu a sawi chhuak.
Van der Ser hi Manchester United lamah season 6 chhung teh meuh mai hlawhtling takin hun alo hmang ve tawh a, United goalkeeper number one a ni. Boardroom lama a insawn hma kum 2011 khan football a chawlhsan.
Old Trafford lama hun a hman lai khan Red Devils chu Premiere League nomawi 4 leh 2008 UEFA Champions League nomawi a chawi pui a ni.
Tunah hian a naupan laia a club Ajax CEO a ni mek a, mahse, a enkawlna hnuaiah Ajax lamin hmasawnna hrang hrang an hmu a, an that phah viau mai, ramchhungah pawh hlawhtlinna an chang nasa a, kum 2019 khan UEFA Champions League semi final an thleng nghe nghe.
Kumin kumtir lamah pawh khan Van der Sar hi United lama kir leh tur anga sawi a ni a, Exevutive vice-chairman Ed Woodward hmun luah khat tura sawi a ni.
Mahse, tunah hian Woodward hi director of football John Murtough nen thawh chhunzawm zel an tum rih niin a lang.
Van der Sar’an Duth media RTL a hrilh dan chuan Ajax-ah ala hlim rih niin a sawi.
“Ajax-ah hian ka la hlim tak zet a ni.” tiin a sawi.
“Hetah hian kum 2 vel hun ka la nei rih a. Club tan thil engemaw tak thlen tir ka duh. Mahse, engtikniah emaw chuan Man Utd lamah ka la kir ngei ang.” tiin a sawi bawk.
Edwind van der Sar hi United board lamah hian thu ta se, an that pui viau i ring em? Ajax board lama a thut hnu hian club lamin hmasawnna hrang hrang an hmu a, an that phah hle a nih kha.
Source Sl