Manchester United chuan Andre Onana aia man tlawm tur zawk Brighton & Hove Albion goalkeeper Robert Sanchez lam an hawi niin report chuan a tarlang.
Daily Mail tarlan danin Red Devils chuan an goalkeeper thar ni turin Spanish international Sanchez chu £30 million vel an lakluh theih an beisei.
Man Utd boss Ten Hag an Ajax-a a lo hrual tawh Andre Onana chu Old Trafford a hruailuh a duh a, amaherawhchu Dutch club hian Cameroon international manah £50 million chhiar in chu chu Man Utd tan a sang hret niin a lang. Transfer window dang ang lo takin Red Devils hian kuminah transfer budget an nei tam lo hle nia report a ni a, kumin nipui bazarah £55 million + £5 million add ons man Mason Mount chu an player thar lakluh tur chiang sa awmchhun a la ni.
Roberto de Zerbi hnuaiah kum 25 a upa Sanchez a inlan tam lova, season hmasa Premier League match hnuhnung 16 ah khan Sanchez hian a team tan match khat chiah a khel. Seagulls in Anderleht atangin goalkeeper thar Bart Verbruggen an sign fel tawh bawk nen, an kawllai mek Sanchez chu to vak lova hralhchhuah mai an phal dawn.
Man Utd in De Gea an chhuah fel hnuin goalkeeper thar lakluh ngei tumin tan an la a, £30 million man vel tura ngaih Robert Sanchez chu tun hnaia an ngaihven thar a ni. Spanish goalkeeper hi Ten Hag an a system ah a that a beisei a, a man a to lutuk dawn lo nen, chuvanga ngaihven thar pawh a nih thu report chuan a tarlang.
Onana leh Sanchez te bakah Dutch goalkeeper kum 25 a upa Justin Bijlow te chu Red Devils nena sawizawm mek goalkeeper te anni. Bijlow hi Ededivisie club Feyenoord tana khel mek niin season hman zawh tâkah khan a team chu league title a chawipui.
