Manchester United chuan Atalanta striker Rasmus Hojlund lâkluh tumin tan an la chhunzawm zel a, an bid hnuhnung berah phei chuan sum fai bakah player an offer tel nghe nghe.
Erik Ten Hag an loan a a hawh Dutch striker Wout Weghorst kawl chhunzawm zel duh lova a chhuah fel hnuin striker thar lâkluh tur a zawng mêk a, tun dinhmunah Danish striker beiseiawm tak Hojlund chu a top target a ni.
Athletic tarlan danin Man Utd chuan Hojlund manah sum fai £40 million bakah player pêk tel an duh a, mahse he an offer hi Atalanta chuan hnawlin sum fai chauh an duh thu in an chhanglet.
Serie-A club hian an striker kum 20 a upa manah hian £85 (€100) million an chhiar nia report a ni a, heihi transfer budget nei tam lo Man Utd tan chuan han theh chhuah mai a awl ai hauh lovang le!
Man Utd hian Mount an lakluh hnuin player lakluh nan £60 million bak an nei tawh lova, chutihlaiin Andre Onana lakluh nan £47 million an insêng leh dawn bawk.
Hetiang anih chuan United sum hman tur la bang zawng chu £13 million bak a ni tawh lova, tun dinhmunah Hojlund lâkluh chu pialtlep leia liluh tum ang vel a ni hawt!
Amaherawhchu United hian player hralhchhuah tur an nei nual a, a bikin Fred, Alex Telles, Donny van de Beek leh Anthony Elanga te chuan kuminah Old Trafford an chhuahsan ngei dawn niin a lang. Tin, Maguire, Sancho, Martial, Williams, Mc Tominay, Greenwood leh Pellistri te pawh Man Utd chhuahsan thei reng anni bawk.
Red Devils hian player hralhna atanga sum an hailuh nual dawn avangin Hojlund lâkluh theihdan a awm ngei dawn a, amaherawhchu sum fai £40 million leh player pêk tel huama Hojlund an dawrna erawh a hlawhchham chiang hle thung.