Man Utd in Hojlund man tur official bid an theh lut

Manchester United chuan Rasmus Hojlund an dawr chho tan a, a man tur Atalanta hnenah official bid hmasa ber pawh an theh lut fel tawh.

Club dangte ang in Red Devils pawhin kumin nipui bazarah an squad thawmthat hna an thawk chho mêk a, midfielder thar Mason Mount leh goalkeeper thar Andre Onana te an lâkluh hnuin striker thar lâkluh tumin tan an khawh leh mêk.

Transfer expert Fabrizio Romano chuan Manchester United in Rasmus Hojlund man tur official bid €50 million + add ons €10 million an theh luh thu a tarlang a, Atalanta lam chhanletna nghah mêk a ni.

Man Utd leh Hojlund te hi mimal thilah a thuphungin inremna an nei fel tawh a, kum 20 a upa hian Old Trafford ah kum 5 chhung daih tur contract a ziak ang.

Danish striker thangduang tak mai hi Paris Saint Germain lam pawhin an dawr ngei a, amaherawhchu a player ber hian Parc des Princes a insuan tumna a nei lova, tun dinhmunah Man Utd chu a lunglai kuai ber tute anni.

Red Devils in Hojlund manah add ons nen €60 million lai offer mahse a la tawk dawn lo niin a lang a, report tarlan danin Atalanta lam hian an striker manah €70-80 million inkar an beisei.

Hojlund hian season hmasa khan Atalanta tan inelna hrang hranga game 34 (20 starts) a inlan atangin goal 10 leh assist vawi 2 a thawkchhuak a, Euro 2024 qualifier ah top scorer ni lai mêk niin Denmark tan game 8 a khelh atangin goal 6 a khung tawh bawk.