Manchester United chuan Atletico Madrid star Antoine Griezamann chu Old Trafford lama an lak luh theihna turin tuna a hlawh let 3 lai mai hlawh pek an huam niin report in a tarlang.
Kan hriat angin Red Devils hian season bul an tan chhe hle a, kum 61 chhunga an tan chhiat ber tum ni. An manager Erik ten Hag hmalam hun pawh a chiang tawh lova, beisei a phak loh zel chuan an ban thuai a rinawm.
Champions League-ah FC Copenhagen chu 4-3 in an hneh lova, amaherawhchu, Luton lakah hnehna an chang hlauh, Premiere League-ah a zawna hnehna an chan tak avang khan Erik ten Hag tan tlemin kawng a kaw leh deuh ti ila kan sawi sual lovang.
Hetihlai hian Marcus Rashford pawh season hmasa lamah che tha viau mahse, tun season-ah beisei a phak loh hle, tun season khelh mekah hian goal 1 chiah ala khung rih a ni.
Chutiang bawkin an player lak luh thar Rasmus Hojlund pawhin Premiere League match 10 a khelh tawh atangin goal ala khung lova, Anthony Martial leh Antony pawh an che tha lo hle. Manager Ten Hag nen intihbuai avanga first team squad-a tello Jadon Sancho a awm bawk.
Heng zawng zawng te anih avang hian Man Utd chuan an attacking line tih chak nan Antoine Griezmann chu lak luh an duh niin El Nacional in a tarlang.
Hemi chungchangah Old Trafford thuneitu thenkhatte chu Spain lamah player sawi pui turin an zin niin an tarlang a ni.
Griezmann’an Old Trafford a zawm theihna turin Atletico Madrid lama a hlawh let 3 vel hlawh thei turin hmin an tum a, United a zawm anih chuan kum khatah €21 million lai a hlawh dawn a ni.
Man United hi a zawm theih anih chuan kar khatah £350,000 vel a hlawh ang, Premiere League player hlawh hnem zingah a tel thei dawn a ni.