Fred lâkluh tuma Galatasaray offer hmasa ber chu Manchester United in an hnâwl a, Red Devils hian an midfielder manah hian £20 million an phut.
Mason Mount an Chelsea atanga Man Utd a zawm fel hnuin Fred hi Old Trafford chhuahsan tur a ni a, tun dinhmunah Galatasaray mai nilo Fulham leh Saudi club te nena sawizawm mêk anni.
Galatasaray lamin Fred lâkluh tumin bid theh lut mahse Man Utd in an hnâwl phawt a, Turkish club hian bid thar nen Fred an dawr chhunzawm leh ang em tih chu kan hre thuai ang.
Fulham manager Marco Silva chu Fred duh em em tu a ni a, kum 30 a upa hi Craven Cottage lama hruailuh ngei tumin tan a la dawn.
Fred hian Old Trafford ah season khat bak contract a nei tawh lova, club hotute’n contract thar ziahpui an tum lo bawk. Tun dinhmunah Galatasaray leh Fulham te chu Fred hnaih ber tu te anni a, Brazil midfielder mana Man Utd phut zat £20 million sen an inhuam erawh a ngai ngei ang.
Hetih mêk lai hian Fred lâkluh tumtu Fulham chuan an striker Aleksandar Mitrovic an chân maithei a, Serbian striker kum 28 a upa lâkluh tum hian Saudi club Al Hilal chuan bid an theh lut tawh nghe nghe.
Mitrovic man tura Al Hilal offer hmasa ber hi Fulham lam chuan an hnâwl phawt a, amaherawhchu Al Hilal hi bid thar nena an rawn kir leh thuai a rinawm.
