Site icon HUAPZAU

Man Utd in De Gea an chhuah dan sawiseltu Ben Foster

Wrexham goalkeeper Ben Foster chuan Manchester United in David De Gea an chhuah dan a sawisel a, Spanish legend hian tun aia zah a phû hle in a hria.

Kum 12 meuh hnuah De Gea an Man Utd chu free agent in a chhuahsan a, Stadium a fans te hma ah inthlahna mumal tak pawh nei lovin Man Utd legend hian hun rei tak chhung a lo khawsak tawhna a mangtha.

Red Devils chuan De Gea thlâktu turin Andre Onana chu Inter Milan atangin £47.5 million in an lalut dawn a, Cameroon goalkeeper hi Man Utd player thara puan a ni thuai ang.

Man Utd goalkeeper hlui Ben Foster chuan a club hlui in De Gea an chhuah dan chu tha a ti lo hle a, hetiang hian a sawisel, “David De Gea chhuah dan mawlh mai hi tha ka ti lo takzet. Man Utd tana a thil tih tawh zawng zawng te ngaituah chuan tun aia zah hi a phu ngawih ngawih! De Gea hian Man Utd tan kum 10 chuang hna ropui tak a thawk a, Player of the Year lawmman a dawng nual bawk. Man Utd tan a che ropui hle thin a, chutih laia hetianga an chhuah mawl tawp mai hi chu a lungawiloh thlak takzet a ni” a ti.

Club hotute’n De Gea an chhuah danah fans tam tak an lungni lo hle a, team captain armband hrêng thin tu Bruno Fernandes pawhin De Gea chuan hei aia zah a phû thu leh Stadium a fans te hmaah ngei inthlahna thu sawi a phu hliah hliah thu Instagram lama De Gea a thlahna thu ah a tarlang tel.

De Gea hi kum 32 a upa chauh a la ni a, European league ah kum engemaw zah chhung a la inlan thei ngei ang. Spanish goalkeeper hian khawi lam nge a pan dawn hriat a la ni lova, tun nipui bazarah Saudi lamin thawm nei lian viau mahse Red Devils goalkeeper hlui hi Europe ah kan la hmuh chhunzawm zel beisei phawt ang.

Exit mobile version