Man Utd in Barca hnehin Europa League last 16 an inhlangkai

Camp Nou ah Europa League round of 16 play off first leg match a 2-2 a an inhnehtawk hnuin Manchester United leh Barcelona te chuan tukin zinglam khan Old Trafford ah 2nd leg match an khel a, Man Utd lam hian 2-1 a chak in a belhkhawm (aggregate) chuan 4-3 in hnehna an chang a, round of 16 an khel dawn. Chutihrualin Barcelona lam erawh tun season atan European inlena an mangtha a tul.

He inkhelah ah hian Robert Lewandowski chuan minute 18 na ah penalty spot atangin goal a khung a, mikhual lamin hma an hruai phawt.

Second half minute 47 na ah mual neitu Manchester United lamin Fred a hmangin an siphurh an sut a, Bruno Fernandes assist a ni. Minute 73 na ah substitution bench atanga rawn lut Brazilian forward Antony chuan Man Utd goal hnihna a khung a, a team chu hnehna a chanpui.

Manchester United hian tun season a an home game hmasa 4 atanga vawi 2 an tlawm hnuin a zawnin home match 18 lai hnehloh tawng lovin an kaltluang tawh (16 wins; 2 draws).

Substitution bench atanga dah luh Man Utd player te’n tun season ah goal 19 lai an khung tawh a, Europe top 5 league atanga khung tam ber anni. Hei hian team squad chhah that zia a tilang chiang viau e.

Robert Lewandowski chuan tun season ah Barcelona tan game 30 (all competition) a inlan atangin goal 25 a khung tawh a, tihian a zawnin season 12 chhung chu season tin goal 25+ a khung ta!

Manchester United game leh tur hi EFL Carabao Cup final match niin Newcastle United nen nomawi an inchuh dawn a, match hi February ni 26 zan dar 10:00 a khelh a ni ang.

Inelna hrang hrang 4 a la tling vek Man Utd fixtures a tight rem rem hle a, chutihrualin Ten Hag hnuaia nomawi an chawi hmasak ber na hun tha a inherchhuak hnai ta viau mai!