Manchester United chuan kumin nipui bazar hian an player pahnih Alex Telles leh Fred te an hralhchhuak dawn.
Fred hi Turkish club Galatasaray chuan lâkluh tumin official bid an theh lut tawh a, mahse Man Utd chuan an hnawl phawt. Galatasaray hian Angelino leh Icardi te lalut tawh mahse an squad tichak zual turin Fred lakluh an la duh cheu a, Man Utd nen indawrna an kalpui chhunzawm ang.
Brazilian midfielder kum 30 a upa hian duhtu a nei nual a, Galatasaray bakah Premier League club Fulham, Nottingham Forest leh Aston Villa te bakah Saudi club thenkhat te nen pawha sawizawm anni.
Fred pawh hian Old Trafford chhuahsan a hnial lem lova, a inkhelh tam theihna tur hmun pan a duh. Club hrang hrang nena sawizawm ni mêk mahse tun dinhmunah Galatasaray chu Fred hnaih ber tu anni thung.
Fred bakah Brazilian international dang Alex Telles pawhin kuminah Man Utd a chhuahsan ngei dawn niin a lang a, kum 30 a upa full back hi Saudi Pro League a Cristiano Ronaldo khelhna Al Nassr chuan lâkluh an tum dawn.
Al Nassr hi player an lâkluh thar te register thei lo tura hrem anni mêk a, Ahmed Musa mana add ons £3,90,000 chu Leicester hnena an pêktlâk hunah an chunga hremna hi lâkkian a ni ang.
Telles hi Al Nassr bakah Benfica, Porto leh Galatasaray te pawhin an ngaihven a, Al Nassr lam chuan an ngam huai ber bakah hlawh an pe tam thei ber dawn bawk. Middle East lam hian player hrawl tak tak Ronaldo, Benzema, Kante, Koulibaly, Firmino leh midang thenkhat an kawl nual a, Telles tan pawh Saudi lam pan mai hi a thlanawm viau mai.
Erik Ten Hag an left back a chhawr tur Luke Shaw, Tyrell Malacia leh Brandon Williams te a kawl a, chuvangin Alex Telles hi a mamawh lem lo. Telles hian season hmasa khan loan in Spanish club Sevilla a zawm a, Sevilla lamin Man Utd full back hi kawl chhunzawm zel an tum lo bawk.
Man Utd chuan kuminah player thar lakluh nan player hralhna atanga sum an hailuh nual a ngai a, tun dinhmunah Fred, Telles, Elanga, Tominay, Maguire, Williams, Greenwood, Martial, Bailly, Sancho, Pellestri leh Van de Beek te chu man neia club chhuahsan thut thei reng te anni hlawm.
Red Devils hian Mason Mount an lâkluh hnuin striker thar leh goalkeeper thar an la beisei a, player hralhna atanga sum an hailuh nual dawn avangin tuna an top target pahnih Onana leh Hojlund te hi an lâkluh ve ve theih a rinawm.