Manchester United chuan World Cup neih zawh taka hming chher tak Sofyan Amrabat an ngaihven mek niin report chuan a tarlang.
January transfer window liamta khan Red Devils chuan Moroccan international hi an lo ngaihven tawh a, amaherawhchu Fiorentina lamin an midfielder hi an chhuah phal mai loh avangin Ten Hag chuan Bayern Munich midfielder Marcel Sabitzer chu a midfield lai tichak zual turin loan hmangin thlaruk chhung atan a hawh ta zawk a ni.
Man Utd in Bayern lama Sabitzer an thawn haw leh takah chuan an hmunruak hnawhkhat turin Amrabat lakluh an rilruk a, an ngaihven mek niin Daily Mail chuan a tarlang. Tin, ESPN chuan Amrabat chungchangah Man Utd leh Fiorentina te’n inbiakna an neih thuai tur thu a tarlang bawk.
Kum 26 a upa midfielder hian Fiorentina ah season khat bak contract a nei tawh lova, contract thar ziah a tum loh avangin club lam pawhin kuminah £30 million a hralhchhuah an remti nia sawi a ni.
Amrabat hi season hmasa khan ram leh club tana player pawimawh a ni a, Morocco chu FIFA World Cup semifinal thlenpuiin Africa ram atanga World Cup semifinal inpettling thei hmasa ber anni nghe nghe.
Tin, club tan 2022/23 season khan inelna hrang hrangah game 47 lai mai a inlan a, team chu Coppa Italia final bakah Europa Conference League final te a luhpui a, amaherawhchu a vanduai zawk ah a tang ve ve hlauh thung.
