Sky Sports pundit Jamie Carragher chuan Manchester United hi Tottenham Hotspur striker Harry Kane duhthlan tur awmchhun anih thu a sawi.
Tottenham Hotspur tana goal khung tam ber Harry Kane goal khung theih zia sawi tam a ngai âwm lo ve, amaherawhchu English international hian tun thlengin major trophy a la chawi lova, a career hman zawh hmaa chawi erawh a thil duh ber anih a rinawm.
Tottenham Hotspur stadium a June 2024 thleng bak contract nei tawh lo Kane hi nipui transfer bazar inhawn hunah Manchester United chuan lâkluh an tum dawn a, German champion Bayern Munich lam pawhin an beisei bawk ang.
Liverpool legend Jamie Carragher chuan an hmelma club Manchester United chu Kane tana club duhthusam ber anih thu a sawi.
Carragher chuan, ” Kane a duhthlan theih awmchhun chu Manchester United hi anni in ka hria. Manchester City in Erling Haaland an kawl a, chuvangin City a kan hmuh chu a rinawm lo. Liverpool in Darwin Nunez an kawl a, Chelsea leh Arsenal te zawm thei a nilo bawk” a ti.
Kum 45 a upa chuan sawi chhunzawmin, “Rampawn lama kal thei a ni a, amaherawhchu Premier League record lam a ngaituah ka ring. Premier League ah a inkhel zel anih chuan top scorer record a siam thei dawn a, hlawhtlinna ropui tak a ni ang. Chuvangin England ah a cham zel anih chuan Man Utd hi a tana duhthlan tur awmchhun anni. Amaherawhchu kum 30 tling tep tawh manah hian Man Utd in £100 million an thehchhuak phal ang em tih hi a ni” a ti.
Premier League goal khung tam ber chu Alan Shearer niin Newcastle United legend hian league goal 260 a nei a, league goal 200 khung tling tawh Tottenham Hotspur striker Harry Kane hian Premier League ah season hnih emaw thum dang pangngai taka a inkhel leh thei anih chuan Shearer record hi a thaichhiat ngei a rinawm.