Ajax chuan tun nipui bazar khan an player pahnih Lisandro Martinez leh Antony te hralhna atangin €165 million lalut mahse an lawm a kim lo.
Ajax hian a hma lam khan Sebastien Haller leh Ryan Gravenberch te chu Borussia Dortmund leh Bayern Munich lamah te an lo chan tawh bawk nen, season hmasa a Champions League last 16 inhlangkai Ajax squad a pan tan hle niin a lang.
“Manchester United in min dawr hun kha a fuh lo hle. A bikin transfer bazar tawp lama thil thleng khan lu a ti hai hle. Kan squad thawmthat tuma hma kan la mêk laiin top class player kan chhuah a ngai a pawi kan ti hle” tiin Ajax Sporting director Gerry Hamstra chuan transfer bazar a thil thlen dan avanga a lawm loh thu a sawi.
“Kan manager kan chan kha pawi kan ti em em a, season hmasa a inkhelh bul tan ziah thin first team player kan chan nual bawk. Tun transfer bazar kha kan beisei lo ang takin thil a thleng. Kan theih ang tawk chuan kan player te kha chelbeh kan tuma, khatiang anga sum tam tham chuan an lakluh ngam pawh kan beisei lo. Antony kha he hmuna la cham zel turin duh mah ila kan chelh theilo. Kan manager lungawiloh chhan pawh kan hrethiam vek, a squad a player tha ber ber te’n an chhuahsana, a tan chuan a beidawnthlak hle a ni ” tiin Gerry Hamstra an a sawi chhunzawm bawk.
Ajax hian an player hralhna atanga an sum hmuh in squad chu thawmtha ve bawk mahse, nikum ang em em chuan an thlen san a beiseiawm lo. Steven Bergwjin, Calvin Bassey leh Brian Brobbey te chuan tun nipui bazar khan Ajax an zawm.