Man Utd chhaihbuai turin kan inpeih – Trippier

Newcastle United captain Kieran Trippier chuan nomawi an chawi theihna tur anih phawt chuan Erik Ten Hag leh a nau te chhaihbuai a, team ninawm tak nih an pawisak loh thu a sawichhuak.

Zanin dar 10 ah Wembley Stadium ah Man Utd leh Newcastle Utd te’n EFL Carabao Cup final match an khel dawn a, inkhel hmuhnawm tak thlir tur a awm dawn e.

Red Devils boss Erik Ten Hag chuan press conference a neih hnuhnun ber khan Carabao Cup an inchuh pui tur Newcastle United lam chu hun khawhral an thiam thu leh team ninawm/hneawm tak an nih thu a sawichhuak.

Man Utd boss thusawi hi Newcastle captain Trippier chuan chhangletin, “Season kal mek ah hian team thenkhat chu kan chungah an lawm vak lo maithei. A pawimawh ber erawh a hun te a finthiam leh kan tawnhriat lo neih tawh te hman tangkai thiam a ni.”

”Kan khingpui fans te pawh an lawm lo hle thin a, a chhan chu an team tan te laka kan khelhdan vang a ni. Mahse heng zawng zawng hi thil pangngai mai a ni a, kan tan chuan hmuh pawh a nuam. Kan tih ang hi team zawng zawng tihtheih a ni pawhin ka hre lova, chuvangin tha ka ti hle. Tu pawhin kan lakah ngaihdan chu an nei thiang a lawm.”

”Heng thil zawng zawng hi Spain ah khan kan lo ti nasa a, game tih muan hun hriat hi a pawimawh hle. Hlawhtlin kan duh chuan a hun taka game thunun dan kan hriatthiam a pawimawh.”

Final khelh hma hauh in nimin lam khan Newcastle United fans te chu Trafalqar Square ah an pungkhawm a, kum 24 hnua final an luh lawm in an ri chel chul mai. Magpies hian zaninah Man Utd tukdawl a nomawi chawi ngei an tum ruh hle a ni.