Mason Mount leh Declan Rice te hi 2007 daih tawha inhre tan niin Chelsea academy a lo inzir ve ve tawh anni a, Rice hi kum 14 anih in Chelsea academy a chhuahsan a, West Ham United academy a zawm.
Mount leh Rice te hi lo thanglian zel in tun hnai kuma Chelsea leh West Ham player pawimawh ber te zinga mi anni a, Mount hi Chelsea player of the year a kum zawna thlan a ni nghe nghe. Tin, Declan hi kum lama upa lo tak la ni mahse West Ham captain a ruat a lo ni tawh a, season hmasa khan a captain-na hnuaiah Hammers chuan Europa Conference League an chawi nghe nghe anih kha.
Player pahnihte hian kuminah an lo chawrchhuahna club an chhuahsan fel ve ve tawh a, Mount hian £60 million a Man Utd a zawm laiin Declan Rice erawh in £105 million lawih in Arsenal a zawm thung a, British player man to ber record a siam.
Mount hian Chelsea a contract thar a ziah loh chhan chu hlawh chungchangah club lam nen an inrem theihloh vang nia sawi a ni a, English international hian a hlawh tam theihna tur Man Utd pan ta nge nge in kum 5 chhung daih tur contract a ziak bawk.
Kum 24 a upa hian Old Trafford ah kartin £2,50,000 a hlawh dawn a, a chet that dan a zirin a hlawh hi karkhata £3,00,000 a kaichho thei tur a ni bawk. Mount hian Chelsea ah khan kartin £80,000 a lalut a, Man Utd lama a hlawh nen chuan a inthlau vet vet hle!
Mount hian Man Utd ah Anthony Martial leh Bruno Fernandes te hlawh zat a hlawh phâk a, Red Devils player hlawh tam ber tur erawh club academy chhuak Marcus Rashford niin English forward hian kartin £3,75,000 hlawh tura Man Utd contract thar zawrh chu a sign hnai.
Hetih mêk lai hian Arsenal player thar Declan Rice pawhin Emirates Stadium ah sum tam tak a hailut dawn a, kum 24 a upa hian Arsenal ah kartin £2,50,000 a hlawh dawn nia report a ni a, London Stadium lama a karkhat hlawh £60,000 nen chuan a inthlau hem hem hle!
Rice hi Arsenal player lakluh to ber ni mahse £65 million man Kai Havertz chu Arsenal player hlawh tam ber a ni a, Chelsea star hlui hian Arsenal ah kartin £3,30,000 a hlawh nia report a ni!
Tun hnai mai khan Gunners player pawimawh Bukayo Saka chuan Arsenal ah contract thar a ziak a, kum 2027 June thla thleng daih tur a ni. Kum 21 a upa hian Arsenal ah kartin £2,00,000 a hlawh tawh a, a chet dan a zirin a karkhat hlawh hi £3,00,000 a pung chho thei tur a la ni cheu.