Man Utd a la châm zel duh Mason Greenwood

A hma hun chiang lo ruai karah Mason Greenwood chu Manchester United a la châm zel a duh niin report chuan a tarlang.

Kum 21 a upa hi pawngsual thubuai avanga kum hnih dawn a inkhelh theihloh hnuin kumin February thla khan a laka case awm zawng zawng te chu Crown Prosecution Service chuan a hlip a, court ah thiam chantir a ni.

A laka case zawng zawng te hlih thlâk ni tawh mahse Man Utd lamin an player hi club tana a la inlan zel an phalsak dawn em hriat a la ni lova, August ni 14 a an league game hmasa ber an khelh hma in Greenwood hma hun tur hi an tih fel hman a rinawm.

Mirror tarlan danin Greenwood hi Old Trafford a la châm zel a duh a, a teammate te hnenah pawh Man Utd tana la inlan zel chu a duhthusam anih thu a hrilh.

Man Utd main sponsor Adidas chuan Mason Greenwood hi club tana a inkhelh leh an phalsak a, Red Devils hotute pawhin an forward hma hun zel tur hi an tichiang thuai ang.

Pre Season tour ah Ten Hag chuan Greenwood chungchang hetiang hian a lo sawi tawh, “Club thutlûkna a innghat a ni a, chutihrualin ngaihdan ka thawh ve ang. Mahse club thutlûkna anih dawn avangin eng ang thutlûkna pawh kan pawm mai a ngai ang. Hemi chungchang hi thui tak ka la sawi thei lova, mahse club hnenah ka ngaihdan leh duhdan te ka thawh ve ang. Chuvangin eng nge thleng zel dawn kan hria ang chu.”

Greenwood hian Old Trafford ah kum 2025 June thla thleng contract a la nei a, a hma hun chiang lo ruai karah Atalanta, AS Roma, Galatasaray leh European club thenkhat te nena sawizawm mêk anni.