Manchester United tana hmun nghet chan leh tum Harry Maguire a thawkrim hle a, tun nipui chawlh chhung hian training pawh a bei ngawrh takzet.
Season hmasa tirlama Brentford leh Brighton te laka an mualpho hnuin Erik Ten Hag an Harry Maguire a thlauhthla tan a, Lisandro Martinez leh Raphael Varane te chu a centre back rinrawl te anni. Tin, left back a khel Luke Shaw pawh Ten Hag hian centre back ah a chhawr leh zeuh thin a, hei hian Harry Maguire a rintawk loh zia a tilang chiang viau âwm e.
Maguire hi Man Utd-a a hma hun chiang lo ruai karah club dang nena sawizawm a ni ve bawk a, tun dinhmunah West Ham United, Tottenham Hotspur, AC Milan, Juventus leh Inter Milan te chuan kum 30 a upa hi an ngaihven mêk vek.
Manager in ringtawk lo mahse £80 million man Maguire hi chuti maia beidawng chi a nilo tlat! The Three Lions tana defender rinrawl hian club tana hmun nghet chang leh turin a thawkrim hle a, nipui chawlh chhung hian amah in training a nei tlauh tlauh a, nitin vawi 3 training session a nei thin!
Kum 30 a upa hian Portugal ah karthum chhung training a nei tawh a, Portuguese legend Chelsea leh Real Madrid tana lo khel tawh Ricardo Carvalho chuan 1v1 a forward te hmachhawn dan tur hrilh in a zirtir nia report a ni bawk.
Maguire hian season hmasa khan Red Devils tan inelna hrang hrangah game 31 chauh a khel a, match 16 ah chauh inkhelh bul a tan bawk. Man Utd a zawm hnua season khata a inlan tlem ber tum a ni a, hmun nghet chang leh turin a bei ngawr hle! Season tharah Foxes defender hlui hi Ten Hag rinrawl a ni thei ang em tih chu kan hre chho thuai ang.