Zanin March ni 4 tlailam dar 6 ah Manchester City chuan an khelmual Etihad Stadium ah Newcastle United an lo mikhual dawn a, top 6 huanga awm team pahnihte insu tur an nih avangin a hmuhnawm lo thei lo.
Champion lai City hian league game 25 atanga point 55 hlawhchhuak tawh in table ah 2-na anni mek a, an nomawi kawllai humhim turin leh an chunga awm Arsenal nen an inkar tizim hret hret turin Magpies laka result duhawm an hlawhchhuah a tul.
Magpies lam ve thung hi league game 23 atanga point 41 hlawhchhuak tawh in season duhawm tak an hmang mêk a, season thara Champions League khelh phâk ngei an tum avangin team tha City laka point hmuh thiam a pawimawh dawn.
Pep Guardiola leh a nau te hian an game hnuhnung 5 ah tlawm hmel an hmu lova, vawi 3 hnehna changin vawi 2 draw result an nei. Eddie Howe leh a nau te erawh an game hnuhnung 5 ah vawi 1 chiah hnehna changin vawi 2 draw result an neih bakah vawi 2 an tlawm. Season duhawm tak hmang mêk mahse Magpies hian tun hnai tê ah beisei an phâk lo hle.
City leh Newcastle te hi an inhmachhawn hnuhnung vawi 5 ah City lam an chungnung zawk a, vawi 4 lai mai hnehna changin match khat ah erawh team pahnihte an inhnehtawk a ni. Naktuk tlailama an inhmachhawn hunah pawh City lam hi chak zawk tura rin anni deuh a, amaherawhchu game anih ang in engpawh thleng thei a ni.
Team news: City lam hian vanneihthlak atangin player inhliam emaw hrem tawk an nei lova, Newcastle lam erawh in Willock , Targett, Fraser leh Krafth te chu hliam avangin an chhawr thei dawn lo.
Man City Predicted XI – Ederson; Ake, Laporte, Akanji, Walker; Rodri, Bernardo, De Bruyne; Grealish, Haaland, Foden
Newcastle Predicted XI – Pope; Trippier, Schar, Botman, Burn; Longstaff, Guimaraes, Joelinton; Almiron, Wilson, Saint-Maximin