2020 UEFA European Championship khelh zawh hunah Manchester City chuan Raheem Sterling contract pawhsei chungchang an ngaihtuah dawn niin Mail online chuan a tarlang.
Euro 2020 khelh mekah Raheem Sterling hi a che tha ang ren hle. Germany nena Round of 16 an khelhah pawh goal hmasa ber khungin, Euro 2020 khelh mekah goal 3 a khung tling der tawh a ni.
Tunah hian Sterling’an Man City-ah kum 2 daih contract a la nei mek a, tuna a hlawh chu kar khatah £300,000 a ni. Kum 2 chhung contract la nei mahse, Euro 2020 khelh zawh hian contract thar chungchang an ngaihtuah tha dawn niin an sawi.
Season khelh zawh takah khan Raheem Sterling hi duh angin a che tha vak lova, sawiseltu pawh an awm ve nuk. A bik takin UEFA Champions League final a Chelsea an hneh loh hnu khan sawiseltu an pung hle. Mahse, City lam hian Sterling chungah rinna tamtak an nei tih chu a chiang hle.
Kum 2019 kha chuan ram leh club tan a che tha hle a, Calendar year ah club leh ram tan goal 43 lai a khung tling a ni. Mahse, season khelh zawh takah kha chuan kumdang a pha lo hle.
City hian kum 2023 thleng contract nei, Gabriel Jesus, Riyad Mahrez leh Ilkay Gundogan te an nei a, tun summer transfer lo awm turah hian an chhuahtir a rinawm lo.
Tunhnai lawk khan Pep Guardiola chuan a squad chu tih thar a duh thu a sawi a, season thar inbuatsaihna atan Harry Kane leh Jack Grealish chu lak luh a tul niin a sawi.
Source Mailonline