European champion Manchester City chuan an midfielder club chhuahsan rilrûk mêk Bernardo Silva chu Barcelona midfieder Frenkie De Jong nena inthleng an duh niin report chuan a tarlang.
Barcelona hian kuminah an squad thawmtha turin Ilkay Gundogan leh Inigo Martinez te chu free transfer in an lalut tawh a, an la duhtawk mai lo, nikum lam atanga an lo hel tawh Portuguese midfielder Silva lâkluh an la duh cheu.
Silva hi season hmasaa City treble champion theihnan a thawhlawk em em a, a team tan inelna hrang hranga game 54 a inlan atangin goal 7 leh assist vawi 6 a thawkchhuak. Kum 28 a upa Portuguese international hi Barca bakah PSG pawhin an hel mêk a, City chuan club a season hnih dang contract la nei Silva manah hian £75 million an chhiar nia report a ni bawk.
City hian Barca lakah Silva an chân dawn rau rau anih chuan Frenkie De Jong nena inthleng an rilrûk niin Football Transfers chuan a tarlang a, De Jong hian Pep Guardiola team tana khelh a hnial lem lovin a rinawm.
Kum 26 a upa hian season hmasa khan Barcelona tan inelna hrang hrangah game 41 a inlan atangin goal 2 leh assist vawi 4 a thawkchhuak a, 2019 hnuah a tumkhat nana Barca in league title an hlawhchhuah leh theih chhanah De Jong hi a thawhhlawk hle.
De Jong hi nikum nipui bazar lai khan Manchester United chuan lâkluh tumin theihtawp chhuah mahse an hlawhchham anih kha. Barca hian an sum dinhmun tihthat deuh nan De Jong hi Man Utd hnenah £85 million a hralhchhuah mai an duh a, amaherawhchu a player berin Camp Nou chhuahsan tumna a neih lem loh avangin a cham ta nge nge a ni.