Man City in Man Utd rawlthar beiseiawm an lalut dawn!

Manchester City chuan kumin nipui bazar hian Manchester United rawlthar beiseiawm tak Harrison Parker an lalut dawn.

Treble champion Manchester City hian first team thawmtha tura tan an lak mek rualin youth team lam pawh an thlauhthla hauh lova, squad thawmtha chho mek in Man Utd rawlthar beiseiawm Parker chu an defense lam tichak zual turin an lalut dawn.

Kum 16 chauha la upa Parker hian kum hnih liamta khan Arsenal atangin Manchester United a zawm a, tunah chuan United hmelma leh elpui ni bawk City sawmna pawmin Etihad Stadium lam a pan hnai.

Transfer expert Fabrizio Romano chuan Harrison Parker transfer chungchangah Man City leh Man Utd te an inrem fel tep niin a tarlang a, United chuan an centre back la naupang tak hi Carrington a youth contract pui ber an offer a, mahse hnawl a ni!

Harrison lakluh tumtu hi City lo club dang pali lai an awm ve bawk nia sawi a ni a, amaherawhchu a player berin City zawm a duh avangin club dang sawmna te a hnawl.

A kum la naupang viau mahse Parker hian ft 6 a pel tawh a, taksa lam leh thiamna lamah a thangduang hle. Kum 15 chauha upa anih khan FA Youth Cup ah Red Devils tan a lo inlan tawh a, kumin September thlaa kum 17 tling tur hian Man Utd Under 18 team tan match 3 a khel tawh bawk.

Man City chuan Parker hi professional contract a ziah theih hma ngei a lakluh an duh a, chuvanga kumin nipui bazara lalut tur pawh anni. Player te hian kum 17 an tlin hma in professional contract an ziak thei lova, City chuan Parker hi kumin September thlaa kum 17 a tlin hunah professional contract ziahpui an tum nghal a ni awm e.