Kan hriat angin Manchester City chuan Juventus atang C Ronaldo chu an la lut hnai niin an lang a, Tun summer transfer zawh hmain Premiere League lamah Cristiano Ronaldo kan hmu thut thei dinhmunah kan ding mek.
Lionel Messi’an Barcelona atang PSG a zawm khan khawvel a barakhaih a nih kha, tun tumah pawh hian Cristiano Ronaldo’an Manchester City a zawm a nih chuan thil mak tak ani leh ngei ang.
Juventus hian C Ronaldo hi a free a zuar an rem ti lova, a man atan Pound maktaduai 28 atanga 30 vel an hauh a ni. A agent Jorge Mendes chuan personal term leh contract chungchangah Manchester City lam a be ve nghal niin report in an tarlang. Juventus lam hian Man City duhthlanna an nghak mek a, Ronaldo man atan hian Pound maktaduai 28 atanga 30 vel an pe thei mai ang em?
Jersey number chungchang
Lionel Messi’an FC Barca atanga Paris Saint-Germain a zawm khan a jersey number chu number 10 atang number 30 ah a thlak a nih kha. He number 30 hi FC Barcelona tana a game a khelh hmasak ber naa a hak a ni nghe nghe. Chutiang bawk chuan Man City lamah C Ronaldo hak tur jersey number hi eng nge ni ve ta ang le?
Old Trafford lamah season 6 chhung hun a hman atang khan jersey number 7 hi C Ronaldo tan chuan a danglam hle. Real Madrid a luh tir khan jersey number 9 a ha a nih kha. 2004-05 season vel khan Portugal tan jersey number 10 a ha bawk.
Rumour hrang hrang awm mahse, Raheem Sterling chu City-ah la cham chhunzawm zel a tum niin a lang, ani hian Jersey number 7 a ha a, Gabriel Jesus pawhin number 9 a ha ve bawk. Lionel Messi ang tho hian jersey number dang hak a ngaih hmel.
Sporting Lisbon tana a khelh lai khan Ronaldo hian jersey number 28 a ha a, tunah hian he number hi Man City-ah a ruak mek. Man City-ah hian lut ta se, he number hi a hak ngei a rinawm.
Source SB